chum lo us hath ko jo hath bik jata na ho

chuum lo us haath ko jo haath bik jaatā na ho

vaqt kī sachchā.iyāñ likhne se ghabrātā na ho

hādisa ye hai ki merī pyaas ne bāñdhī hai aas

aise bādal se barasnā hī jise aatā na ho

koī raahī itnā bhī bebas nahīñ hotā jise

koī aañsū koī jugnū raah dikhlātā na ho

is kā imkāñ hai ki is shahr-e-sarāb-o-ḳhvāb meñ

jis ko pā letā ho insāñ us ko bhī paatā na ho

koī din aisā nahīñ ai ḳhūb-sūrat zindagī

jab mirī āñkhoñ meñ terā ruup lahrātā na ho

dil meñ armāñ le ke chaltā ho to mumkin hī nahīñ

aadmī shīshe se yā patthar se Takrātā na ho

vo koī tasvīr hai jis meñ na ho rang-e-vafā

vo koī manzar hai jo āñkhoñ ko bahlātā na ho

ik irāda hai junūñ hai ik safar hai zindagī

hādsoñ se vo Dare jiinā jise aatā na ho

aise sūraj se to miTTī kā diyā achchhā 'bashīr'

aisā sūraj jo kisī āñgan talak jaatā na ho

chum lo us hath ko jo hath bik jata na ho

waqt ki sachchaiyan likhne se ghabraata na ho

hadisa ye hai ki meri pyas ne bandhi hai aas

aise baadal se barasna hi jise aata na ho

koi rahi itna bhi bebas nahin hota jise

koi aansu koi jugnu rah dikhlata na ho

is ka imkan hai ki is shahr-e-sarab-o-KHwab mein

jis ko pa leta ho insan us ko bhi pata na ho

koi din aisa nahin ai KHub-surat zindagi

jab meri aankhon mein tera rup lahraata na ho

dil mein arman le ke chalta ho to mumkin hi nahin

aadmi shishe se ya patthar se Takraata na ho

wo koi taswir hai jis mein na ho rang-e-wafa

wo koi manzar hai jo aankhon ko bahlata na ho

ek irada hai junun hai ek safar hai zindagi

hadson se wo Dare jina jise aata na ho

aise suraj se to miTTi ka diya achchha 'bashir'

aisa suraj jo kisi aangan talak jata na ho