dad se shad nahin shikwa-e-bedad nahin

daad se shaad nahīñ shikva-e-bedād nahīñ

ab to apnī bhī tabī.at kā pata yaad nahīñ

kyā kahā un se rifāqat kī vajah TuuT ga.ī

chalo achchhā huā naġhma nahīñ fariyād nahīñ

kis qadar haif hai us bazm kī ārā.ish par

jo tirī chaah ke sadqe meñ bhī barbād nahīñ

aise vīrānoñ meñ dastak bhī kahāñ deñ ki jahāñ

shahr-e-ḳhāmosh tamannāoñ se ābād nahīñ

āḳhirash ho to gayā dil kā mudāvā lekin

vasl meñ hijr kī vo lazzat-e-nāshād nahīñ

yak-ba-yak dhund chhaTī nayyar-e-tābāñ niklā

is se baḌh kar hameñ rāz-e-ġham-e-dil yaad nahīñ

asr-e-hāzir kā adab rū-ba-tanazzul 'farhat'

har vo naqqād hai abjad bhī jise yaad nahīñ

dad se shad nahin shikwa-e-bedad nahin

ab to apni bhi tabiat ka pata yaad nahin

kya kaha un se rifaqat ki wajah TuT gai

chalo achchha hua naghma nahin fariyaad nahin

kis qadar haif hai us bazm ki aaraish par

jo teri chah ke sadqe mein bhi barbaad nahin

aise viranon mein dastak bhi kahan den ki jahan

shahr-e-KHamosh tamannaon se aabaad nahin

aaKHirash ho to gaya dil ka mudawa lekin

wasl mein hijr ki wo lazzat-e-nashad nahin

yak-ba-yak dhund chhaTi nayyar-e-taban nikla

is se baDh kar hamein raaz-e-gham-e-dil yaad nahin

asr-e-hazir ka adab ru-ba-tanazzul 'farhat'

har wo naqqad hai abjad bhi jise yaad nahin