daere khinch liye baat se aage na gae

dā.ere khīñch liye baat se aage na ga.e

tañg-nazar log rivāyāt se aage na ga.e

chāhte ham to bahut kuchh the zamāne meñ magar

tujh ko chāhā to tirī zaat se aage na ga.e

kārvāñ Thahr ga.e raat guzar jaane tak

rāhbar the ki rivāyāt se aage na ga.e

tujh se bichhḌe to ka.ī baar sadā aa.ī hameñ

ham ga.e bhī to ḳharābāt se aage na ga.e

ham ko 'mumtāz' thī ummīd vafā kī jin se

vo bhī do chaar mulāqāt se aage na ga.e

daere khinch liye baat se aage na gae

tang-nazar log riwayat se aage na gae

chahte hum to bahut kuchh the zamane mein magar

tujh ko chaha to teri zat se aage na gae

karwan Thahr gae raat guzar jaane tak

rahbar the ki riwayat se aage na gae

tujh se bichhDe to kai bar sada aai hamein

hum gae bhi to KHarabaat se aage na gae

hum ko 'mumtaz' thi ummid wafa ki jin se

wo bhi do chaar mulaqat se aage na gae