dagh-e-dil apna kisi tarah dikhae na bane

dāġh-e-dil apnā kisī tarah dikhā.e na bane

aur chāhūñ jo chhupānā to chhupā.e na bane

dāman-e-dil meñ vo jab chāheñ lagā deñ ik aag

ham agar chāheñ bujhānā to bujhā.e na bane

tum ko manzūr nahīñ apne taġhāful se gurez

ham pe ban aa.ī hai aisī ki banā.e na bane

uf re ye tīra-nasībī ye añdhere kā faroġh

diip āñkhoñ kā jalā.ūñ to jalā.e na bane

haa.e ye fitrat-e-husn uf vo mizāj-e-nāzuk

naaz uThānā bhī jo chāhūñ to uThā.e na bane

soch ke dījiye dīvāne ko dāman kī havā

ye bhī mumkin hai ki phir hosh meñ aa.e na bane

naaz hai tāqat-e-guftār pe 'māhir' ko magar

dil pe guzrī hai kuchh aisī ki sunā.e na bane

dagh-e-dil apna kisi tarah dikhae na bane

aur chahun jo chhupana to chhupae na bane

daman-e-dil mein wo jab chahen laga den ek aag

hum agar chahen bujhana to bujhae na bane

tum ko manzur nahin apne taghaful se gurez

hum pe ban aai hai aisi ki banae na bane

uf re ye tira-nasibi ye andhere ka farogh

dip aankhon ka jalaun to jalae na bane

hae ye fitrat-e-husn uf wo mizaj-e-nazuk

naz uThana bhi jo chahun to uThae na bane

soch ke dijiye diwane ko daman ki hawa

ye bhi mumkin hai ki phir hosh mein aae na bane

naz hai taqat-e-guftar pe 'mahir' ko magar

dil pe guzri hai kuchh aisi ki sunae na bane