dam mein hum ko late ho tum dil aTka hai aur kahin

daam meñ ham ko laate ho tum dil aTkā hai aur kahīñ

sher paḌhāne ham se aur mazmūn gaThā hai aur kahīñ

āñkheñ zarā milānā idhar ko kyuuñ jī ye kyā bāteñ haiñ

baat kī ham se uThānī lazzat jī kā mazā hai aur kahīñ

haq to hai kuchh hāl-e-dil apnā kahte haiñ jab tum se ham

kaan lagā.e sunte ho par dhyān lagā hai aur kahīñ

dekhiyo ye ayyārī koī kyā kyā ham ko lapeTe meñ

vo but-e-pur-fan letā hai dil jis ne diyā hai aur kahīñ

Tok ke us se baat karūñ to yuuñ vo kahe hai chitvan meñ

mujh ko na chheḌo dhyān ajī is vaqt mirā hai aur kahīñ

ham se zabānī milne ko tum kahte ho ham jānte haiñ

dil se par aane jaane kā iqrār kiyā hai aur kahīñ

dekh ke ham ko jo kahte ho tum aao baiTho baat karo

bāteñ ye sab zāhir kī haiñ uns huā hai aur kahīñ

ab to kuchh hamdard se mere aate ho tum mujh ko nazar

tum sā shāyad koī pyāre tum ko milā hai aur kahīñ

baiThe ho mujh paas va-lekin ghabrāne se nikle hai

aañkh bachā kar uTh jaane kā dhyān bañdhā hai aur kahīñ

zāhir meñ tum kahte ho mujh ko baiTho abhī to jaao na ghar

mujh ko to ma.alūm hai jo paiġhām gayā hai aur kahīñ

bāteñ kar ke lagāvaT kī ye kāfir huuñ gar jhuuT kahūñ

dil ko mire tum lete ho jī nām-e-ḳhudā hai aur kahīñ

haif hai us ke hone par jo yaad karo tum ġhair ko jaan

'jur.at' meñ jo nahīñ so aisī baat vo kyā hai aur kahīñ

dam mein hum ko late ho tum dil aTka hai aur kahin

sher paDhane hum se aur mazmun gaTha hai aur kahin

aankhen zara milana idhar ko kyun ji ye kya baaten hain

baat ki hum se uThani lazzat ji ka maza hai aur kahin

haq to hai kuchh haal-e-dil apna kahte hain jab tum se hum

kan lagae sunte ho par dhyan laga hai aur kahin

dekhiyo ye ayyari koi kya kya hum ko lapeTe mein

wo but-e-pur-fan leta hai dil jis ne diya hai aur kahin

Tok ke us se baat karun to yun wo kahe hai chitwan mein

mujh ko na chheDo dhyan aji is waqt mera hai aur kahin

hum se zabani milne ko tum kahte ho hum jaante hain

dil se par aane jaane ka iqrar kiya hai aur kahin

dekh ke hum ko jo kahte ho tum aao baiTho baat karo

baaten ye sab zahir ki hain uns hua hai aur kahin

ab to kuchh hamdard se mere aate ho tum mujh ko nazar

tum sa shayad koi pyare tum ko mila hai aur kahin

baiThe ho mujh pas wa-lekin ghabrane se nikle hai

aankh bacha kar uTh jaane ka dhyan bandha hai aur kahin

zahir mein tum kahte ho mujh ko baiTho abhi to jao na ghar

mujh ko to malum hai jo paigham gaya hai aur kahin

baaten kar ke lagawaT ki ye kafir hun gar jhuT kahun

dil ko mere tum lete ho ji nam-e-KHuda hai aur kahin

haif hai us ke hone par jo yaad karo tum ghair ko jaan

'jurat' mein jo nahin so aisi baat wo kya hai aur kahin