daman-e-shab mein chand ka manzar bhi dekh le

dāmān-e-shab meñ chāñd kā manzar bhī dekh le

sone se pahle kamre se bāhar bhī dekh le

in mausamoñ kī raah meñ yuuñ be-ḳhabar na baiTh

rahtā hai kaun kaun safar par bhī dekh le

gum-sum rakhegī tujh ko kahāñ tak vo ek yaad

muñh se haTā ke mailī sī chādar bhī dekh le

dhundlā rahī hai der se sham-e-badan kī lau

koī ġhubār saañs ke andar bhī dekh le

ābād zer-e-āb haiñ Duube hue nagar

yādoñ ke pāniyoñ meñ utar kar bhī dekh le

fursat mile to khol chhupe ḳhvāhishoñ ke raaz

gunjān jañgaloñ se guzar kar bhī dekh le

'shāhīñ' badan bhī zer kiyā jaañ bhī zer kar

dasht-e-balā se aage samundar bhī dekh le

daman-e-shab mein chand ka manzar bhi dekh le

sone se pahle kamre se bahar bhi dekh le

in mausamon ki rah mein yun be-KHabar na baiTh

rahta hai kaun kaun safar par bhi dekh le

gum-sum rakhegi tujh ko kahan tak wo ek yaad

munh se haTa ke maili si chadar bhi dekh le

dhundla rahi hai der se sham-e-badan ki lau

koi ghubar sans ke andar bhi dekh le

aabaad zer-e-ab hain Dube hue nagar

yaadon ke paniyon mein utar kar bhi dekh le

fursat mile to khol chhupe KHwahishon ke raaz

gunjaan jangalon se guzar kar bhi dekh le

'shahin' badan bhi zer kiya jaan bhi zer kar

dasht-e-bala se aage samundar bhi dekh le