daman-e-hasti mein patthar bhar liye

dāman-e-hastī meñ patthar bhar liye

ham ne kuchh kār-e-numāyāñ kar liye

kho ga.e nazdīkiyoñ ke pher meñ

dūriyoñ ke marhale tai kar liye

jiine vāloñ ko salīqa aa gayā

zindagī kī dilkashī par mar liye

ho ga.e utnā hī maqbūl-e-jahāñ

jis qadar ilzām apne sar liye

hausla-mandī nahīñ to kuchh nahīñ

valvale hoñ laakh bāl-o-par liye

be-kasī insāf ko rotī rahī

jurm-e-nā-karda-gunāhī sar liye

choT phūloñ kī bhī kuchh kam to nahīñ

sang-dil baiThe haiñ kyoñ patthar liye

tangī-e-dāmāñ hameñ rah rah ga.ī

sab ne apne apne dāman bhar liye

dar-ba-dar phirte haiñ kis ummīd par

ahl-e-dil ehsās ke gauhar liye

khoī khoī zindagī hai aur ham

dil meñ ik tasvīr-e-be-e-paikar liye

muntazir haiñ apnoñ kī bāheñ 'rishī'

āstīnoñ meñ chhupe ḳhanjar liye

daman-e-hasti mein patthar bhar liye

hum ne kuchh kar-e-numayan kar liye

kho gae nazdikiyon ke pher mein

duriyon ke marhale tai kar liye

jine walon ko saliqa aa gaya

zindagi ki dilkashi par mar liye

ho gae utna hi maqbul-e-jahan

jis qadar ilzam apne sar liye

hausla-mandi nahin to kuchh nahin

walwale hon lakh baal-o-par liye

be-kasi insaf ko roti rahi

jurm-e-na-karda-gunahi sar liye

choT phulon ki bhi kuchh kam to nahin

sang-dil baiThe hain kyon patthar liye

tangi-e-daman hamein rah rah gai

sab ne apne apne daman bhar liye

dar-ba-dar phirte hain kis ummid par

ahl-e-dil ehsas ke gauhar liye

khoi khoi zindagi hai aur hum

dil mein ek taswir-e-be-e-paikar liye

muntazir hain apnon ki bahen 'rishi'

aastinon mein chhupe KHanjar liye