daman-e-zist ko iman se bhar bhi dena

dāman-e-zīst ko īmān se bhar bhī denā

ai ḳhudā merī duāoñ meñ asar bhī denā

ye tire zikr se ġhāfil na ho ik lamha bhī

ḳhāna-e-dil ko tirī yaad se bhar bhī denā

tere jalvoñ se ho pur-nūr mirā ḳhāna-e-dil

ho taḌap jis meñ mujhe aisī nazar bhī denā

ye kisī aur ke aage na jhuke tere sivā

sar meñ saudā ho tirā bas vahī sar bhī denā

terī ḳhātir hameñ jiine kā hunar aatā hai

ham ko aatā hai tire naam pe sar bhī denā

jis se mil jaa.e mujhe manzil-e-hastī merī

ai ḳhudā mujh ko vahī azm-e-safar bhī denā

kor-bīnoñ ko tū chāhe to basīrat de de

tū samajhtā hai kise aisī nazar bhī denā

vo bhī 'maqsūd' haiñ arbāb-e-nazar meñ shāmil

un ko lāzim hai tujhe dād-e-hunar bhī denā

daman-e-zist ko iman se bhar bhi dena

ai KHuda meri duaon mein asar bhi dena

ye tere zikr se ghafil na ho ek lamha bhi

KHana-e-dil ko teri yaad se bhar bhi dena

tere jalwon se ho pur-nur mera KHana-e-dil

ho taDap jis mein mujhe aisi nazar bhi dena

ye kisi aur ke aage na jhuke tere siwa

sar mein sauda ho tera bas wahi sar bhi dena

teri KHatir hamein jine ka hunar aata hai

hum ko aata hai tere nam pe sar bhi dena

jis se mil jae mujhe manzil-e-hasti meri

ai KHuda mujh ko wahi azm-e-safar bhi dena

kor-binon ko tu chahe to basirat de de

tu samajhta hai kise aisi nazar bhi dena

wo bhi 'maqsud' hain arbab-e-nazar mein shamil

un ko lazim hai tujhe dad-e-hunar bhi dena