daman pe jam ke rah gai ya aastin par

dāman pe jam ke rah ga.ī yā āstīn par

Tapkī na ek buuñd lahū kī zamīn par

insāniyat ke dars kī takmīl ho ga.ī

aa.egā ab na koī payambar zamīn par

āñdhī tavahhumāt kī kis zor kī chalī

uḌne lagī hai dhuul fazā-e-yaqīn par

aib-o-hunar parakhne kā jis ko shu.ūr hai

aa.e na pyaar kyoñ mujhe us nukta-chīn par

phūTī tire laboñ ke tabassum se jo kiran

chamkī lakīr ban ke sahar kī jabīn par

ujḌā to phir basā na kabhī qasr-e-dil mirā

vīrāniyoñ kā saayā hai ab shah-nashīn par

guzrā hazār talḳhī-e-hālāt se magar

ubhrī koī shikan na 'asar' kī jabīn par

daman pe jam ke rah gai ya aastin par

Tapki na ek bund lahu ki zamin par

insaniyat ke dars ki takmil ho gai

aaega ab na koi payambar zamin par

aandhi tawahhumat ki kis zor ki chali

uDne lagi hai dhul faza-e-yaqin par

aib-o-hunar parakhne ka jis ko shuur hai

aae na pyar kyon mujhe us nukta-chin par

phuTi tere labon ke tabassum se jo kiran

chamki lakir ban ke sahar ki jabin par

ujDa to phir basa na kabhi qasr-e-dil mera

viraniyon ka saya hai ab shah-nashin par

guzra hazar talKHi-e-haalat se magar

ubhri koi shikan na 'asar' ki jabin par