daman pe wo ashkon ki tahrir nazar aai

dāman pe vo ashkoñ kī tahrīr nazar aa.ī

har ġham meñ mohabbat kī tasvīr nazar aa.ī

ye fasl-e-bahārāñ kā e.ajāz ma.āz-allāh

zanjīr na thī lekin zanjīr nazar aa.ī

ā.īna-e-irfāñ meñ jab husn-e-azal dekhā

har barg kī jumbish meñ taqdīr nazar aa.ī

ai shām-e-alam ruk jā ik ashk ne lau dī hai

ab tujh se nibhāne kī tadbīr nazar aa.ī

gulshan kī fazāoñ ne kaisā ye chalan badlā

phūloñ meñ bhī kāñToñ kī tāsīr nazar aa.ī

hāsil hai sukūñ lekin betāb nigāheñ haiñ

āḳhir ye hameñ kis kī tasvīr nazar aa.ī

nākāmi-e-paiham se jab TuuT ga.ī himmat

taskīn kī ik sūrat taqdīr nazar aa.ī

ā.īna-e-gulshan par jab chashm-e-ḳhirad Thahrī

phūloñ ke bhī pairoñ meñ zanjīr nazar aa.ī

ham un se shikāyat bhī ai 'shauq' kahāñ karte

har-gām pe jab apnī taqsīr nazar aa.ī

daman pe wo ashkon ki tahrir nazar aai

har gham mein mohabbat ki taswir nazar aai

ye fasl-e-bahaaran ka eajaz maaz-allah

zanjir na thi lekin zanjir nazar aai

aaina-e-irfan mein jab husn-e-azal dekha

har barg ki jumbish mein taqdir nazar aai

ai sham-e-alam ruk ja ek ashk ne lau di hai

ab tujh se nibhane ki tadbir nazar aai

gulshan ki fazaon ne kaisa ye chalan badla

phulon mein bhi kanTon ki tasir nazar aai

hasil hai sukun lekin betab nigahen hain

aaKHir ye hamein kis ki taswir nazar aai

nakaami-e-paiham se jab TuT gai himmat

taskin ki ek surat taqdir nazar aai

aaina-e-gulshan par jab chashm-e-KHirad Thahri

phulon ke bhi pairon mein zanjir nazar aai

hum un se shikayat bhi ai 'shauq' kahan karte

har-gam pe jab apni taqsir nazar aai