daman qarar-e-dil ke sab tar tar dekhe

dāman qarār-e-dil ke sab taar taar dekhe

jab terī vādiyoñ ke kuchh ābshār dekhe

jis ne tirī ḳhizāñ ke aise nikhār dekhe

gulzār-e-ḳhuld kī phir vo kyā bahār dekhe

har sub.h kī jhalak meñ har shaam kī shafaq meñ

sau sau tarah ke ham ne naqsh-o-nigār dekhe

bādal kā ghir ke aanā kud kī pahāḌiyoñ par

ai kaash vo nazāra phir chashm-e-zār dekhe

ik pardā-posh aalam ko be-naqāb dekhā

jab sabz sabz tere ye kohsār dekhe

gul-rez sarzamīñ meñ vo dil-farebiyāñ haiñ

jo ek baar dekhe vo baar baar dekhe

bach bach ke jin se ab tak tai kar rahe the rāheñ

vo tiir aaj ham ne siine ke paar dekhe

daman qarar-e-dil ke sab tar tar dekhe

jab teri wadiyon ke kuchh aabshaar dekhe

jis ne teri KHizan ke aise nikhaar dekhe

gulzar-e-KHuld ki phir wo kya bahaar dekhe

har subh ki jhalak mein har sham ki shafaq mein

sau sau tarah ke hum ne naqsh-o-nigar dekhe

baadal ka ghir ke aana kud ki pahaDiyon par

ai kash wo nazara phir chashm-e-zar dekhe

ek parda-posh aalam ko be-naqab dekha

jab sabz sabz tere ye kohsar dekhe

gul-rez sarzamin mein wo dil-farebiyan hain

jo ek bar dekhe wo bar bar dekhe

bach bach ke jin se ab tak tai kar rahe the rahen

wo tir aaj hum ne sine ke par dekhe