dastan dil ki kabhi humse sunai na gai

dāstāñ dil kī kabhī ham se sunā.ī na ga.ī

aag ashkoñ se kabhī dil kī bujhā.ī na ga.ī

ham ne chāhā to bahut un ko bhulā deñ lekin

yaad un kī kabhī is dil se bhulā.ī na ga.ī

ġham-e-jānāñ bhī thā darpesh ġham-e-daurāñ bhī

kashtī-e-jāñ ye kināre pe lagā.ī na ga.ī

zaḳhm ik aur diyā aap ne jaate jaate

baat yuuñ bigḌī ki phir baat banā.ī na ga.ī

vaqt ne ek hī lamhe meñ use toḌ diyā

ek dīvār jo donoñ se girā.ī na ga.ī

log bhar lete haiñ dāman meñ masarrat kaise

ham se to dard kī daulat bhī kamā.ī na ga.ī

muntaqil kaise vo kar pā.egī virsa aage

gar na.ī nasl ko tahzīb sikhā.ī na ga.ī

kaise mil pā.eñge ham ahl-e-qalam se 'azrā'

ham se gar bazm-e-suḳhan aaj sajā.ī na ga.ī

dastan dil ki kabhi hum se sunai na gai

aag ashkon se kabhi dil ki bujhai na gai

hum ne chaha to bahut un ko bhula den lekin

yaad un ki kabhi is dil se bhulai na gai

gham-e-jaanan bhi tha darpesh gham-e-dauran bhi

kashti-e-jaan ye kinare pe lagai na gai

zaKHm ek aur diya aap ne jate jate

baat yun bigDi ki phir baat banai na gai

waqt ne ek hi lamhe mein use toD diya

ek diwar jo donon se girai na gai

log bhar lete hain daman mein masarrat kaise

hum se to dard ki daulat bhi kamai na gai

muntaqil kaise wo kar paegi wirsa aage

gar nai nasl ko tahzib sikhai na gai

kaise mil paenge hum ahl-e-qalam se 'azra'

hum se gar bazm-e-suKHan aaj sajai na gai