dastan kah ke pareshan dil-e-nakaam na ho

dāstāñ kah ke pareshāñ dil-e-nākām na ho

is ḳhamoshī meñ bhī pinhāñ koī paiġhām na ho

ishq meñ bhī hai taqāzā mirī ḳhuddārī kā

jo mire dil ko milī hai vo ḳhalish-e-ām na ho

māñgne hī kā tarīqa nahīñ aatā ham ko

ġhair-mumkin hai tirī chashm-e-karam aam na ho

phuul ke saa.e meñ kāñToñ ko bhī rahne diije

sub.h kī qadr na kī jaa.e agar shaam na ho

had se jo chiiz bhī baḌhtī hai badal jaatī hai

kis tarah merī vafāoñ kā junūñ naam na ho

aaj kyuuñ haath tire kaañp rahe haiñ saaqī

dekh to ḳhuun ġharīboñ kā tah-e-jām na ho

kaun aisā hai jo duniyā kī zabāñ ko roke

maiñ ne maanā ki mire lab pe tirā naam na ho

jalva-e-husn numāyāñ hai har ik zarre se

kyā kiyā jaa.e agar zauq-e-nazar aam na ho

kār-e-duniyā meñ lage rahte haiñ ham ai 'shārib'

shā.irī us ke liye hai jise kuchh kaam na ho

dastan kah ke pareshan dil-e-nakaam na ho

is KHamoshi mein bhi pinhan koi paigham na ho

ishq mein bhi hai taqaza meri KHuddari ka

jo mere dil ko mili hai wo KHalish-e-am na ho

mangne hi ka tariqa nahin aata hum ko

ghair-mumkin hai teri chashm-e-karam aam na ho

phul ke sae mein kanTon ko bhi rahne dije

subh ki qadr na ki jae agar sham na ho

had se jo chiz bhi baDhti hai badal jati hai

kis tarah meri wafaon ka junun nam na ho

aaj kyun hath tere kanp rahe hain saqi

dekh to KHun gharibon ka tah-e-jam na ho

kaun aisa hai jo duniya ki zaban ko roke

main ne mana ki mere lab pe tera nam na ho

jalwa-e-husn numayan hai har ek zarre se

kya kiya jae agar zauq-e-nazar aam na ho

kar-e-duniya mein lage rahte hain hum ai 'shaarib'

shairi us ke liye hai jise kuchh kaam na ho