dawa-e-did kiya jab kisi shaidai ne

dāva-e-dīd kiyā jab kisī shaidā.ī ne

chār-sū aag chhiḌak dī tirī ra.anā.ī ne

laakh dhoke diye rañgīnī-o-rānā.ī ne

aañkh uThā kar bhī na dekhā tire shaidā.ī ne

un marīzān-e-mohabbat kī davā hai na duā

kar diyā jin pe karam terī masīhā.ī ne

Duub kar dil ne kiyā ġharq safīna āḳhir

bahr-e-ulfat meñ Duboyā nahīñ gahrā.ī ne

naqsh-e-pā un kā magar sar ko mayassar na huā

dar-ba-dar ḳhvār kiyā zauq-e-jabīñ-sā.ī ne

sañg haiñ guhar-e-guhar jin kī ziyā baḳhshī se

bazm-e-hastī meñ kuchh aise bhī to haiñ ā.īne

ham ne dekhā to zamāne kī nazar us pe uThī

bhar diyā rañg tamāshe meñ tamāshā.ī ne

dekhne hī na diyā un ko 'rishī' mahfil meñ

kuchh tahayyur ne kuchh andesha-e-rusvā.ī ne

dawa-e-did kiya jab kisi shaidai ne

chaar-su aag chhiDak di teri ranai ne

lakh dhoke diye rangini-o-ranai ne

aankh uTha kar bhi na dekha tere shaidai ne

un marizan-e-mohabbat ki dawa hai na dua

kar diya jin pe karam teri masihai ne

Dub kar dil ne kiya gharq safina aaKHir

bahr-e-ulfat mein Duboya nahin gahrai ne

naqsh-e-pa un ka magar sar ko mayassar na hua

dar-ba-dar KHwar kiya zauq-e-jabin-sai ne

sang hain guhar-e-guhar jin ki ziya baKHshi se

bazm-e-hasti mein kuchh aise bhi to hain aaine

hum ne dekha to zamane ki nazar us pe uThi

bhar diya rang tamashe mein tamashai ne

dekhne hi na diya un ko 'rishi' mahfil mein

kuchh tahayyur ne kuchh andesha-e-ruswai ne