dafn sab miTTi mein shoron ke qabile ho gae

dafn sab miTTī meñ shoroñ ke qabīle ho ga.e

un ke qisse dil bahalne ke vasīle ho ga.e

mil gayā miTTī meñ kitne bādshāhoñ kā ġhurūr

jo mahal the kuchh dinoñ pahle vo Tiile ho ga.e

be-ruḳhī ne bāġhbāñ kī kar diyā gulshan tabāh

phuul tak shāḳhoñ pe murjhā kar nukīle ho ga.e

aap kī bastī meñ jab bahrī samā'at ho ga.ī

koyaleñ gūñgī huiiñ kavve surīle ho ga.e

ho ga.ī be-rang shahzāde kī us din zindagī

ek doshīza ke jis din haath piile ho ga.e

log sāñpoñ ko gale meñ Daal kar mahfūz haiñ

aur ham chandan se bhī lipTe to niile ho ga.e

dafn sab miTTi mein shoron ke qabile ho gae

un ke qisse dil bahalne ke wasile ho gae

mil gaya miTTi mein kitne baadshahon ka ghurur

jo mahal the kuchh dinon pahle wo Tile ho gae

be-ruKHi ne baghban ki kar diya gulshan tabah

phul tak shaKHon pe murjha kar nukile ho gae

aap ki basti mein jab bahri sama'at ho gai

koyalen gungi huin kawwe surile ho gae

ho gai be-rang shahzade ki us din zindagi

ek doshiza ke jis din hath pile ho gae

log sanpon ko gale mein Dal kar mahfuz hain

aur hum chandan se bhi lipTe to nile ho gae