daftar mein bekar ki baaten karte rahiye

daftar meñ bekār kī bāteñ karte rahiye

hafte-bhar itvār kī bāteñ karte rahiye

jab tak sach-much 'ishq nahīñ ho jaa.e kisī se

ek ḳhayālī yaar kī bāteñ karte rahiye

bīmāroñ ko yuuñ hī tasallī dī jaatī hai

un se kisī bīmār kī bāteñ karte rahiye

piiTh dikhānā yaad dilāte rahiye us ko

buzdil se talvār kī bāteñ karte rahiye

ham ne to is kaan sunā us kaan uḌāyā

aap samundar paar kī bāteñ karte rahiye

mel se baḌh kar khaTpaT se raunaq rahtī hai

āñgan meñ dīvār kī bāteñ karte rahiye

daftar mein bekar ki baaten karte rahiye

hafte-bhar itwar ki baaten karte rahiye

jab tak sach-much 'ishq nahin ho jae kisi se

ek KHayali yar ki baaten karte rahiye

bimaron ko yun hi tasalli di jati hai

un se kisi bimar ki baaten karte rahiye

piTh dikhana yaad dilate rahiye us ko

buzdil se talwar ki baaten karte rahiye

hum ne to is kan suna us kan uDaya

aap samundar par ki baaten karte rahiye

mel se baDh kar khaTpaT se raunaq rahti hai

aangan mein diwar ki baaten karte rahiye