dair-o-haram ko chhoD ke ai dil chal baiTho maiKHane mein

dair-o-haram ko chhoḌ ke ai dil chal baiTho maiḳhāne meñ

ḳhuub guzar jā.egī apnī saaqī se yārāne meñ

sair tabī.at ho jā.egī nasha jo hai hovegā vahī

farq nahīñ hai saaqī hargiz chullū meñ paimāne meñ

ruuh hai jab tak jism ke andar jism pe mere raunaq hai

kāshāna ābād hai jab tak bulbul hai kāshāne meñ

dast-e-tamannā qat.a huā barbād huī hai hirs-o-havā

ziist kī sūrat apnī bañdhī ai nafs tire mar jaane meñ

sach hai dil ko apne bhī juz yaad sanam kuchh dhyān nahīñ

dekh to ai nāseh kaisī hushyārī hai dīvāne meñ

fikr-e-duniyā se haiñ chhuTe is rañj-e-jahāñ se paa.ī najāt

laakh tarah kī rāhat paa.ī ik apne mar jaane meñ

pesh-e-junūn-e-baḳhta ai dil maut to ziist se ḳhush-tar hai

sham.a ke aage raqs-kunāñ thā parvāna jal jaane meñ

husn-e-nairañg us mah-rū kā dil-e-hazīñ meñ rahtā hai

chashm-e-bīnā ho to dekhe bastī hai vīrāne meñ

naqsh-e-mohabbat kahīñ na paayā lauh-e-dil par insāñ ke

phirā qalam kī sūrat se maiñ barsoñ ik ik ḳhāne meñ

dair-o-haram ko chhoD ke ai dil chal baiTho maiKHane mein

KHub guzar jaegi apni saqi se yarane mein

sair tabiat ho jaegi nasha jo hai howega wahi

farq nahin hai saqi hargiz chullu mein paimane mein

ruh hai jab tak jism ke andar jism pe mere raunaq hai

kashana aabaad hai jab tak bulbul hai kashane mein

dast-e-tamanna qata hua barbaad hui hai hirs-o-hawa

zist ki surat apni bandhi ai nafs tere mar jaane mein

sach hai dil ko apne bhi juz yaad sanam kuchh dhyan nahin

dekh to ai naseh kaisi hushyari hai diwane mein

fikr-e-duniya se hain chhuTe is ranj-e-jahan se pai najat

lakh tarah ki rahat pai ek apne mar jaane mein

pesh-e-junun-e-baKHta ai dil maut to zist se KHush-tar hai

shama ke aage raqs-kunan tha parwana jal jaane mein

husn-e-nairang us mah-ru ka dil-e-hazin mein rahta hai

chashm-e-bina ho to dekhe basti hai virane mein

naqsh-e-mohabbat kahin na paya lauh-e-dil par insan ke

phira qalam ki surat se main barson ek ek KHane mein