dam-ba-dam mera taraf-dar hua karta tha

dam-ba-dam merā taraf-dār huā kartā thā

ye jo dushman hai kabhī yaar huā kartā thā

jo tire dil se taḌī-pār huā kartā thā

marg-e-tanhā.ī se do-chār huā kartā thā

maiñ samajhtā thā mohabbat hī mirī daulat hai

par mirā yaar samajh-dār huā kartā thā

ik masīhā-e-mohabbat kā matab sāmne thā

aur maiñ shauq se bīmār huā kartā thā

haa.e vo log jo kahte the vahī karte the

jin kā likkhā huā shahkār huā kartā thā

pahle tahzīb se ḳhabreñ bhī paḌhī jaatī thiiñ

aur aḳhbār bhī aḳhbār huā kartā thā

chashm-e-hairāñ meñ liye phirtā hai apnī hasrat

ḳhush-nasībī kā jo me'yār huā kartā thā

āñkh-bhar dekh liyā kartā thā us ko phir maiñ

aa.ina dekh ke sarshār huā kartā thā

ye jo rasta tumheñ dushvār nazar aatā hai

chaar qadmoñ kī mirī maar huā kartā thā

ab mujhe dekh ke muñh pher liyā kartā hai

pahle vo ā.ina-bardār huā kartā thā

ab to dushman bhī nahīñ hai vo hamārā 'ārif'

yaar vo yaar jo dil-dār huā kartā thā

dam-ba-dam mera taraf-dar hua karta tha

ye jo dushman hai kabhi yar hua karta tha

jo tere dil se taDi-par hua karta tha

marg-e-tanhai se do-chaar hua karta tha

main samajhta tha mohabbat hi meri daulat hai

par mera yar samajh-dar hua karta tha

ek masiha-e-mohabbat ka matab samne tha

aur main shauq se bimar hua karta tha

hae wo log jo kahte the wahi karte the

jin ka likkha hua shahkar hua karta tha

pahle tahzib se KHabren bhi paDhi jati thin

aur aKHbar bhi aKHbar hua karta tha

chashm-e-hairan mein liye phirta hai apni hasrat

KHush-nasibi ka jo me'yar hua karta tha

aankh-bhar dekh liya karta tha us ko phir main

aaina dekh ke sarshaar hua karta tha

ye jo rasta tumhein dushwar nazar aata hai

chaar qadmon ki meri mar hua karta tha

ab mujhe dekh ke munh pher liya karta hai

pahle wo aaina-bardar hua karta tha

ab to dushman bhi nahin hai wo hamara 'arif'

yar wo yar jo dil-dar hua karta tha