dam-ba-dam TuTti aawaz mein gaya hai mujhe

dam-ba-dam TūTtī āvāz meñ gaayā hai mujhe

mutrib-e-vaqt ne be-sarfa gañvāyā hai mujhe

lamha-lamha mirī tā'mīr huī hai lekin

lamha-lamha kisī ehsās ne Dhāyā hai mujhe

marg-e-ehsās kā mumkin ho to mātam kiije

ab sulagtī huī ye dhuup bhī saayā hai mujhe

kis kī tahrīr thā maiñ mujh ko gumāñ hotā hai

huuñ maiñ vo harf ki dānista miTāyā hai mujhe

be-ta’alluq hai mire shām-o-sahar se ab tak

jaise khone hī ko us shaḳhs ne paayā hai mujhe

ġham kī dīvār se lag kar maiñ khaḌā huuñ chup-chāp

kis ne be-jān sī tasvīr banāyā hai mujhe

ab ke mausam kī tabāhī se bachegā na koī

sahmī sahmī sī havāoñ ne batāyā hai mujhe

sho’la-zāroñ meñ mirī aañkh khulī hai aksar

barf-zāroñ meñ kisī ne jo sulāyā hai mujhe

maiñ koī phuul nahīñ dhuul huuñ sahrāoñ kī

tum ne kyā jaan ke juuḌe meñ sajāyā hai mujhe

ab maiñ tanhā.ī kī us manzil-e-ābād meñ huuñ

hāsil-e-har-do-jahāñ ḳhud mirā saaya hai mujhe

kaun thā jo mire ḳhvāboñ meñ ḳhalal Daal gayā

kaun hai jis ne sar-e-shām jagāyā hai mujhe

kal kī tasvīr se maiñ aaj bhī nā-vāqif huuñ

aa.ine ne mirā maazī hī dikhāyā hai mujhe

jab zamīñ mere liye tang huī hai 'arshad'

āsmānoñ ne mohabbat se uThāyā hai mujhe

dam-ba-dam TuTti aawaz mein gaya hai mujhe

mutrib-e-waqt ne be-sarfa ganwaya hai mujhe

lamha-lamha meri ta'mir hui hai lekin

lamha-lamha kisi ehsas ne Dhaya hai mujhe

marg-e-ehsas ka mumkin ho to matam kije

ab sulagti hui ye dhup bhi saya hai mujhe

kis ki tahrir tha main mujh ko guman hota hai

hun main wo harf ki danista miTaya hai mujhe

be-ta’alluq hai mere sham-o-sahar se ab tak

jaise khone hi ko us shaKHs ne paya hai mujhe

gham ki diwar se lag kar main khaDa hun chup-chap

kis ne be-jaan si taswir banaya hai mujhe

ab ke mausam ki tabahi se bachega na koi

sahmi sahmi si hawaon ne bataya hai mujhe

sho’la-zaron mein meri aankh khuli hai aksar

barf-zaron mein kisi ne jo sulaya hai mujhe

main koi phul nahin dhul hun sahraon ki

tum ne kya jaan ke juDe mein sajaya hai mujhe

ab main tanhai ki us manzil-e-abaad mein hun

hasil-e-har-do-jahan KHud mera saya hai mujhe

kaun tha jo mere KHwabon mein KHalal Dal gaya

kaun hai jis ne sar-e-sham jagaya hai mujhe

kal ki taswir se main aaj bhi na-waqif hun

aaine ne mera mazi hi dikhaya hai mujhe

jab zamin mere liye tang hui hai 'arshad'

aasmanon ne mohabbat se uThaya hai mujhe