dam-bhar ki KHushi bais-e-azar bhi hogi

dam-bhar kī ḳhushī bā.is-e-āzār bhī hogī

is raah meñ saaya hai to dīvār bhī hogī

sadiyoñ se jahāñ jis ke ta.āqub meñ ravāñ hai

vo sā.at-e-sad-rañg giraftār bhī hogī

rañgoñ kī ridā oḌh ke us reg-e-ravāñ par

utrī hai jo shab vo shab-e-dīdār bhī hogī

iThlā.egā palkoñ pe kabhī sub.h kā taarā

bedār kabhī nargis-e-bīmār bhī hogī

kahtā hai mire kaan meñ ḳhushbū kā payāmī

muñh-band kalī mā.il-e-guftār bhī hogī

saa.e se lipaT jā.eñge paañv se ba-har-gām

rusvā.ī kuchh apnī sar-e-bāzār bhī hogī

ai shab na kaTegī tire siine kī siyāhī

ik shoḳh kiran muft gunahgār bhī hogī

sunte haiñ ki har sub.h ke hāthoñ meñ 'rashīd' ab

zahrāb meñ Duubī huī talvār meñ hogī

dam-bhar ki KHushi bais-e-azar bhi hogi

is rah mein saya hai to diwar bhi hogi

sadiyon se jahan jis ke taaqub mein rawan hai

wo saat-e-sad-rang giraftar bhi hogi

rangon ki rida oDh ke us reg-e-rawan par

utri hai jo shab wo shab-e-didar bhi hogi

iThlaega palkon pe kabhi subh ka tara

bedar kabhi nargis-e-bimar bhi hogi

kahta hai mere kan mein KHushbu ka payami

munh-band kali mail-e-guftar bhi hogi

sae se lipaT jaenge panw se ba-har-gam

ruswai kuchh apni sar-e-bazar bhi hogi

ai shab na kaTegi tere sine ki siyahi

ek shoKH kiran muft gunahgar bhi hogi

sunte hain ki har subh ke hathon mein 'rashid' ab

zahrab mein Dubi hui talwar mein hogi