dam-e-ruKHsat faraham hijr ka saman karte hain

dam-e-ruḳhsat farāham hijr kā sāmān karte haiñ

dil-e-hairat-zadā ko aur bhī hairān karte haiñ

uThā.eñ kis qadar ehsāñ karam-farmā.iyoñ kā ham

zamāne-bhar meñ kahte haiñ ki vo ehsān karte haiñ

nazar-andāz karne kā gila un se nahīñ lekin

hameñ bhī dekhnā hai vo kise mehmān karte haiñ

Darāte kyā ho nādānoñ unheñ ūñchī 'imārat se

chaTānoñ kā jo siina chiir kar maidān karte haiñ

vafā kī justujū meñ ham kisī vīrān raste par

matā’-e-zindagī kā kis qadar nuqsān karte haiñ

darūn-e-zāt kī pechīdgī kuchh kam nahīñ 'ahmar'

zamāne ke liye ham shā'irī āsān karte haiñ

dam-e-ruKHsat faraham hijr ka saman karte hain

dil-e-hairat-zada ko aur bhi hairan karte hain

uThaen kis qadar ehsan karam-farmaiyon ka hum

zamane-bhar mein kahte hain ki wo ehsan karte hain

nazar-andaz karne ka gila un se nahin lekin

hamein bhi dekhna hai wo kise mehman karte hain

Daraate kya ho nadanon unhen unchi 'imarat se

chaTanon ka jo sina chir kar maidan karte hain

wafa ki justuju mein hum kisi viran raste par

mata’-e-zindagi ka kis qadar nuqsan karte hain

darun-e-zat ki pechidgi kuchh kam nahin 'ahmar'

zamane ke liye hum sha'iri aasan karte hain