dam ghuTa jata hai aae kis tarah taza hawa

dam ghuTā jaatā hai aa.e kis tarah taaza havā

kar ga.ī hai band aaj ek ek darvāza havā

kaun sī āñkhoñ se dekhūñ zindagī kī bebasī

chehra chehra mal rahī hai maut kā ġhāza havā

qahr paiham Dhā rahī hai ḳhushbuoñ ke shahr meñ

dekhnā tum ek din bhugtegī ḳhamyāza havā

dhūp-zāroñ ko koī tārāj kar saktā nahīñ

kyā bikheregī bhalā sūraj kā shīrāza havā

zor phir kaaTā tirā mere par-e-parvāz ne

phir ġhalat sābit huā hai terā andāza havā

aao is ke qalb meñ jā kar diye raushan kareñ

kas rahī hai der se ham sab par āvāza havā

rauzanoñ par makḌiyoñ ke jaal kī chādar tanī

ghar meñ 'jauhar' kaise aa.e saaf aur taaza havā

dam ghuTa jata hai aae kis tarah taza hawa

kar gai hai band aaj ek ek darwaza hawa

kaun si aankhon se dekhun zindagi ki bebasi

chehra chehra mal rahi hai maut ka ghaza hawa

qahr paiham Dha rahi hai KHushbuon ke shahr mein

dekhna tum ek din bhugtegi KHamyaza hawa

dhup-zaron ko koi taraj kar sakta nahin

kya bikheregi bhala suraj ka shiraaza hawa

zor phir kaTa tera mere par-e-parwaz ne

phir ghalat sabit hua hai tera andaza hawa

aao is ke qalb mein ja kar diye raushan karen

kas rahi hai der se hum sab par aawaza hawa

rauzanon par makDiyon ke jal ki chadar tani

ghar mein 'jauhar' kaise aae saf aur taza hawa