dam toDte ek aise bimar ko dekha hai

dam toḌte ik aise bīmār ko dekhā hai

yā apnī apāhij sī sarkār ko dekhā hai

jab sar se lahū phūTā jab shīsha-e-dil TuuTā

patthar liye apne ik tab yaar ko dekhā hai

tū ne bhī kahāñ dekhā ham jaise qalandar ko

ham ne bhī kahāñ tere darbār ko dekhā hai

andhoñ kī hifāzat meñ aivān-e-siyāsat hai

darvāze nahīñ dekhe dīvār ko dekhā hai

in surma.ī āñkhoñ ko unvān-e-ġhazal kar ke

ḳhvāboñ meñ bhī ḳhanjar ko talvār ko dekhā hai

jab vaqt ke dariyā ne rukne kā adab sīkhā

ik raushnī dekhī hai raftār ko dekhā hai

bikte hue fan dekhe nīlām qalam dekhe

ġhazloñ kī dukāñ dekhī bāzār ko dekhā hai

dam toDte ek aise bimar ko dekha hai

ya apni apahij si sarkar ko dekha hai

jab sar se lahu phuTa jab shisha-e-dil TuTa

patthar liye apne ek tab yar ko dekha hai

tu ne bhi kahan dekha hum jaise qalandar ko

hum ne bhi kahan tere darbar ko dekha hai

andhon ki hifazat mein aiwan-e-siyasat hai

darwaze nahin dekhe diwar ko dekha hai

in surmai aankhon ko unwan-e-ghazal kar ke

KHwabon mein bhi KHanjar ko talwar ko dekha hai

jab waqt ke dariya ne rukne ka adab sikha

ek raushni dekhi hai raftar ko dekha hai

bikte hue fan dekhe nilam qalam dekhe

ghazlon ki dukan dekhi bazar ko dekha hai