dar aaya andhera aankhon mein aur sab manzar dhundlae hain

dar aayā añdherā āñkhoñ meñ aur sab manzar dhundlā.e haiñ

ye vaqt hai dil ke Dūbne kā aur shaam ke gahre saa.e haiñ

ye zarā zarā sī ḳhushiyāñ bhī to laakh jatan se miltī haiñ

mat chheḌo ret-gharoñdoñ ko kis mushkil se ban paa.e haiñ

vo lamha dil kī aziyyat kā to guzar gayā ab sochne do

kyā kahnā hogā un se mujhe jo pursish-e-ġham ko aa.e haiñ

jaltī huī sham.oñ ne aksar ehsās kī raakh ko bhaḌkāyā

qurbat meñ damakte chehroñ kī tanhā.ī ke dukh yaad aa.e haiñ

sochoñ ko tar-o-tāza rakkhā 'shabnam' tire paiham ashkoñ ne

hairat hai ki ahd-e-ḳhizāñ meñ bhī ye phuul nahīñ kumhlā.e haiñ

dar aaya andhera aankhon mein aur sab manzar dhundlae hain

ye waqt hai dil ke Dubne ka aur sham ke gahre sae hain

ye zara zara si KHushiyan bhi to lakh jatan se milti hain

mat chheDo ret-gharondon ko kis mushkil se ban pae hain

wo lamha dil ki aziyyat ka to guzar gaya ab sochne do

kya kahna hoga un se mujhe jo pursish-e-gham ko aae hain

jalti hui shamon ne aksar ehsas ki rakh ko bhaDkaya

qurbat mein damakte chehron ki tanhai ke dukh yaad aae hain

sochon ko tar-o-taza rakkha 'shabnam' tere paiham ashkon ne

hairat hai ki ahd-e-KHizan mein bhi ye phul nahin kumhlae hain