dar-ba-dar kucha-ba-kucha der tak bhaTkegi raat

dar-ba-dar kūcha-ba-kūcha der tak bhaTkegī raat

phir thakan se chuur ho kar mere ghar Thahregī raat

pahle pī kar ḳhuub hangāme karegī bazm meñ

dil kī tanhā.ī se āḳhir dostī kar legī raat

ujḌī āñkhoñ meñ basā kar jhūTe ḳhvāboñ kī ḳhalish

jhuktī palkoñ ko mirī phir pyaar se chūmegī raat

bevafā mahbūb kī mānind ruḳhsat din huā

ek ik pal kā hisāb ab dekhnā māñgegī raat

kaise tai hoñge bhalā ye roz-o-shab ke fāsle

ham to so jā.eñge thak kar jaag kar sochegī raat

ā.īye ab lauT chaliye ghar kī jānib ai 'hasan'

aap ko ghar meñ na pā kar raat bhar jāgegī raat

dar-ba-dar kucha-ba-kucha der tak bhaTkegi raat

phir thakan se chur ho kar mere ghar Thahregi raat

pahle pi kar KHub hangame karegi bazm mein

dil ki tanhai se aaKHir dosti kar legi raat

ujDi aankhon mein basa kar jhuTe KHwabon ki KHalish

jhukti palkon ko meri phir pyar se chumegi raat

bewafa mahbub ki manind ruKHsat din hua

ek ek pal ka hisab ab dekhna mangegi raat

kaise tai honge bhala ye roz-o-shab ke fasle

hum to so jaenge thak kar jag kar sochegi raat

aaiye ab lauT chaliye ghar ki jaanib ai 'hasan'

aap ko ghar mein na pa kar raat bhar jagegi raat