dar-ba-dar mazdur ki taqdir soch

dar-ba-dar mazdūr kī taqdīr soch

mar gayā hai kyoñ bhalā rahgīr soch

ālam-e-pazhmurdagī ke darmiyāñ

hausloñ se pur koī tahrīr soch

aa ke maqtal meñ tazabzub kis liye

ḳhvāb dekhā hai to phir ta.abīr soch

ik makān-e-muḳhtasar se ḳhush na ho

ye zamīñ ho kis tarah tasḳhīr soch

zulm sahnā zulm kī tā.īd hai

kaise TuuTe zulm kī zanjīr soch

be-sabab taḳhrīb-e-gulshan rok de

phuul ho jaa.eñ agar shamshīr soch

tū nigāhoñ se churātā hai sukūñ

ye ḳhatā hai lā.iq-e-tāzīr soch

laash bachche kī liye sākit hai vo

kyoñ na royā sāhib-e-tasvīr soch

sab to apne the adū koī na thā

kar diyā paivast kis ne tiir soch

shikva-e-iflās 'as.ad' chhoḌ kar

kyoñ bikī ajdād kī jāgīr soch

dar-ba-dar mazdur ki taqdir soch

mar gaya hai kyon bhala rahgir soch

aalam-e-pazhmurdagi ke darmiyan

hauslon se pur koi tahrir soch

aa ke maqtal mein tazabzub kis liye

KHwab dekha hai to phir tabir soch

ek makan-e-muKHtasar se KHush na ho

ye zamin ho kis tarah tasKHir soch

zulm sahna zulm ki taid hai

kaise TuTe zulm ki zanjir soch

be-sabab taKHrib-e-gulshan rok de

phul ho jaen agar shamshir soch

tu nigahon se churaata hai sukun

ye KHata hai laiq-e-tazir soch

lash bachche ki liye sakit hai wo

kyon na roya sahib-e-taswir soch

sab to apne the adu koi na tha

kar diya paiwast kis ne tir soch

shikwa-e-iflas 'asad' chhoD kar

kyon biki ajdad ki jagir soch