dar dariche ke bina aur kisi chhat ke baghair

dar darīche ke binā aur kisī chhat ke baġhair

ham tire shahr meñ sākin haiñ sukūnat ke baġhair

jang aisī hai abad tak bhī rahegī jaarī

mas.ala hal nahīñ honā hai qayāmat ke baġhair

ḳhāmushī jism pe chaḌhtī hai harārat kī tarah

roz ik shor utartā hai 'alāmat ke baġhair

saath meñ yaar bhī ho aur phir itvār bhī ho

baat bantī nahīñ cigarette kī ri'āyat ke baġhair

yaar kaise na ho merā ki mirā yaar mujhe

har tarah se hai qubūl aur vazāhat ke baġhair

dhyān rakhnā ki ye lahja hai hamārā lahja

pur-asar ho nahīñ saktā hai mohabbat ke baġhair

kaam aisā hai ki karnā hī paḌegā 'āmir'

chāhe teshe ke binā ho yā riyāzat ke baġhair

dar dariche ke bina aur kisi chhat ke baghair

hum tere shahr mein sakin hain sukunat ke baghair

jang aisi hai abad tak bhi rahegi jari

masala hal nahin hona hai qayamat ke baghair

KHamushi jism pe chaDhti hai hararat ki tarah

roz ek shor utarta hai 'alamat ke baghair

sath mein yar bhi ho aur phir itwar bhi ho

baat banti nahin cigarette ki ri'ayat ke baghair

yar kaise na ho mera ki mera yar mujhe

har tarah se hai qubul aur wazahat ke baghair

dhyan rakhna ki ye lahja hai hamara lahja

pur-asar ho nahin sakta hai mohabbat ke baghair

kaam aisa hai ki karna hi paDega 'amir'

chahe teshe ke bina ho ya riyazat ke baghair