dar-e-KHairaat pahle khol dena

dar-e-ḳhairāt pahle khol denā

mire hāthoñ meñ phir kashkol denā

haqīqat ko qalam se tol denā

na afsāne meñ koī jhol denā

jo dil meñ hai vo sach sach bol denā

hamāre raaz saare khol denā

na jab jur.at ho goyā.ī kī lab ko

zabān-e-chashm hī se bol denā

thakā-māñda jo maiñ lauTūñ kahīñ se

to darvāze kī kunDī khol denā

patā kuchh aur detā hai ḳhirad ko

junūñ kā dasht meñ par tol denā

havā aa.ī hai maazī ke chaman se

darīche dil ke saare khol denā

mire aañsū tire dāman ke motī

nahīñ mumkin hai jin kā mol denā

maiñ sun luuñ terī kaḌvī guftugū ko

mire kānoñ meñ amrit ghol denā

mirī āñkhoñ ko ye fan aa gayā hai

tire dāman meñ motī rol denā

dar-e-KHairaat pahle khol dena

mere hathon mein phir kashkol dena

haqiqat ko qalam se tol dena

na afsane mein koi jhol dena

jo dil mein hai wo sach sach bol dena

hamare raaz sare khol dena

na jab jurat ho goyai ki lab ko

zaban-e-chashm hi se bol dena

thaka-manda jo main lauTun kahin se

to darwaze ki kunDi khol dena

pata kuchh aur deta hai KHirad ko

junun ka dasht mein par tol dena

hawa aai hai mazi ke chaman se

dariche dil ke sare khol dena

mere aansu tere daman ke moti

nahin mumkin hai jin ka mol dena

main sun lun teri kaDwi guftugu ko

mere kanon mein amrit ghol dena

meri aankhon ko ye fan aa gaya hai

tere daman mein moti rol dena