dar-haqiqat roz-o-shab ki talKHiyan jati rahin

dar-haqīqat roz-o-shab kī talḳhiyāñ jaatī rahīñ

zindagī se sab mirī dilchaspiyāñ jaatī rahīñ

naam thā jab tak to ham par saikḌoñ ilzām the

ho ga.e gumnām to rusvā.iyāñ jaatī rahīñ

ab ḳhayāloñ meñ vo mere saath sub.h-o-shām hai

jab se vo bichhḌā hai saarī dūriyāñ jaatī rahīñ

is qadar tanhā.iyoñ ne toḌ Daalā hai mujhe

jism se ho kar judā parchhā.iyāñ jaatī rahīñ

taale paḌ jā.eñge hoñToñ par tumhāre soch lo

mere hoñToñ se agar ḳhāmoshiyāñ jaatī rahīñ

lag rahā hai ḳhatm honā chāhtā hai silsila

ab dil-e-nādāñ kī betābiyāñ jaatī rahīñ

dar-haqiqat roz-o-shab ki talKHiyan jati rahin

zindagi se sab meri dilchaspiyan jati rahin

nam tha jab tak to hum par saikDon ilzam the

ho gae gumnam to ruswaiyan jati rahin

ab KHayalon mein wo mere sath subh-o-sham hai

jab se wo bichhDa hai sari duriyan jati rahin

is qadar tanhaiyon ne toD Dala hai mujhe

jism se ho kar juda parchhaiyan jati rahin

tale paD jaenge honTon par tumhaare soch lo

mere honTon se agar KHamoshiyan jati rahin

lag raha hai KHatm hona chahta hai silsila

ab dil-e-nadan ki betabiyan jati rahin