dar pe dastak si hui ghar se nikalne ke liye

dar pe dastak sī huī ghar se nikalne ke liye

vaqt hai aan paḌā vaqt badalne ke liye

ek vo saañs jo fariyād meñ ghuT kar TuuTī

ek paiġhām thā tūfān ko chalne ke liye

ek āvāz se kuchh aur uThīñ āvāzeñ

kitnā kuchh aur hai duniyā meñ badalne ke liye

zaḳhm bharne ke liye zaḳhm bhī khāne hoñge

ḳhaar par chalnā paḌe ḳhaar kuchalne ke liye

ḳhud sahar apnī karo noch ke sūraj apnā

muntazir kyoñ ho bhalā raat ke Dhalne ke liye

kaun kab aag parā.ī meñ jalā hai 'zarra'

aag siine kī hī darkār hai jalne ke liye

dar pe dastak si hui ghar se nikalne ke liye

waqt hai aan paDa waqt badalne ke liye

ek wo sans jo fariyaad mein ghuT kar TuTi

ek paigham tha tufan ko chalne ke liye

ek aawaz se kuchh aur uThin aawazen

kitna kuchh aur hai duniya mein badalne ke liye

zaKHm bharne ke liye zaKHm bhi khane honge

KHar par chalna paDe KHar kuchalne ke liye

KHud sahar apni karo noch ke suraj apna

muntazir kyon ho bhala raat ke Dhalne ke liye

kaun kab aag parai mein jala hai 'zarra'

aag sine ki hi darkar hai jalne ke liye