dar pe laga di KHamoshi ki taKHti kya

dar pe lagā dī ḳhāmoshī kī taḳhtī kyā

sannāTe ke haath pe bai'at kar lī kyā

pyaar ke naam pe taj detī hai tan man dhan

is bastī meñ pāgal hai har laḌkī kyā

ThanDak ne par kaaT diye haiñ ravānī ke

barf ke tūdoñ kī rau par hai kashtī kyā

naav ke paañv zaḳhmī hote jaate haiñ

rāhguzar paanī kī huī pathrīlī kyā

sab kī ḳhabar letī phirtī hai ravish ravish

saare ġham kī rakhvālī hai titlī kyā

ḳhuun hī pī kar mānegā ye dard kā saañp

jaan hī le kar jā.egī tanhā.ī kyā

jam.a kiye haiñ ye jo itne rang 'qamar'

shahr-e-ġhazal meñ aa.ī hai dīvālī kyā

dar pe laga di KHamoshi ki taKHti kya

sannaTe ke hath pe bai'at kar li kya

pyar ke nam pe taj deti hai tan man dhan

is basti mein pagal hai har laDki kya

ThanDak ne par kaT diye hain rawani ke

barf ke tudon ki rau par hai kashti kya

naw ke panw zaKHmi hote jate hain

rahguzar pani ki hui pathrili kya

sab ki KHabar leti phirti hai rawish rawish

sare gham ki rakhwali hai titli kya

KHun hi pi kar manega ye dard ka sanp

jaan hi le kar jaegi tanhai kya

jama kiye hain ye jo itne rang 'qamar'

shahr-e-ghazal mein aai hai diwali kya