dar se mayus tere talib-e-ikram chale

dar se māyūs tire tālib-e-ikrām chale

kaisī ummīd liye aa.e the nākām chale

o mirī bazm-e-tamannā ke sajāne vaale

lutf kar lutf ki duniyā meñ tirā naam chale

chhīn le charḳh-e-sitamgār se andāz-e-ḳhirām

kuchh agar zor tirā gardish-e-ayyām chale

ek vo haiñ ki tirā lutf-o-karam hai jin par

ek ham haiñ ki tirī bazm se nākām chale

azm-e-rāsiḳh ne bhī ghabrā ke qadam toḌ diye

kūcha-e-yār meñ ham yuuñ sahar-o-shām chale

mast āñkhoñ kā agar ek ishāra ho jaa.e

vajd meñ aa.e subū aur kahīñ jaam chale

niiñd bīmār-e-mohabbat ko kahīñ aatī hai

sub.h tā-shām agar bād-e-subuk-gām chale

rah-rav-e-ishq haiñ manzil kī hameñ kyā ummīd

kyā chale ḳhaak agar baiTh ke do-gām chale

kaun jaa.e hadaf-e-tīr-e-nazar hone ko

sabr se kaam agar ai dil-e-nākām chale

haif sad haif thī ummīd-e-rifāqat jin se

aaj vo bhī mire sar thop ke ilzām chale

ek 'shātir' ke na hone se bigaḌtā kyā hai

terī mahfil rahe ābād tirā naam chale

dar se mayus tere talib-e-ikram chale

kaisi ummid liye aae the nakaam chale

o meri bazm-e-tamanna ke sajaane wale

lutf kar lutf ki duniya mein tera nam chale

chhin le charKH-e-sitamgar se andaz-e-KHiram

kuchh agar zor tera gardish-e-ayyam chale

ek wo hain ki tera lutf-o-karam hai jin par

ek hum hain ki teri bazm se nakaam chale

azm-e-rasiKH ne bhi ghabra ke qadam toD diye

kucha-e-yar mein hum yun sahar-o-sham chale

mast aankhon ka agar ek ishaara ho jae

wajd mein aae subu aur kahin jam chale

nind bimar-e-mohabbat ko kahin aati hai

subh ta-sham agar baad-e-subuk-gam chale

rah-raw-e-ishq hain manzil ki hamein kya ummid

kya chale KHak agar baiTh ke do-gam chale

kaun jae hadaf-e-tir-e-nazar hone ko

sabr se kaam agar ai dil-e-nakaam chale

haif sad haif thi ummid-e-rifaqat jin se

aaj wo bhi mere sar thop ke ilzam chale

ek 'shatir' ke na hone se bigaDta kya hai

teri mahfil rahe aabaad tera nam chale