daraKHt mujhko nai kahani suna rahe hain

daraḳht mujh ko na.ī kahānī sunā rahe haiñ

ki ye parinde ga.e dinoñ meñ ḳhudā rahe haiñ

maiñ kuchh dinoñ meñ ḳhudā se milne ko jā rahā huuñ

mujhe lakīroñ ko paḌhne vaale batā rahe haiñ

tamām shahroñ ko dushmanoñ ne bachā liyā hai

mire sipāhī bas apnī jāneñ bachā rahe haiñ

sisak rahe haiñ tamām va.ada nibhāne vaale

ki ham ye kaisī aziyyatoñ ko nibhā rahe haiñ

kisī ne khiḌkī ko kholnā hai to dekhnā hai

so ham galī meñ guloñ ke jhurmuT lagā rahe haiñ

bichhaḌne vaale ne kab palaT kar ye dekhnā hai

ki ġham badan ke tamām hissoñ ko khā rahe haiñ

ye peḌ vāqif haiñ in fusūñ-ḳhez ḳhushbuoñ se

so ehtirāman tamām sar ko jhukā rahe haiñ

daraKHt mujh ko nai kahani suna rahe hain

ki ye parinde gae dinon mein KHuda rahe hain

main kuchh dinon mein KHuda se milne ko ja raha hun

mujhe lakiron ko paDhne wale bata rahe hain

tamam shahron ko dushmanon ne bacha liya hai

mere sipahi bas apni jaanen bacha rahe hain

sisak rahe hain tamam wada nibhane wale

ki hum ye kaisi aziyyaton ko nibha rahe hain

kisi ne khiDki ko kholna hai to dekhna hai

so hum gali mein gulon ke jhurmuT laga rahe hain

bichhaDne wale ne kab palaT kar ye dekhna hai

ki gham badan ke tamam hisson ko kha rahe hain

ye peD waqif hain in fusun-KHez KHushbuon se

so ehtiraman tamam sar ko jhuka rahe hain