daraKHt raat parindon ke kan bharne lage

daraḳht raat parindoñ ke kaan bharne lage

isī liye to vo ūñchī uḌaan bharne lage

isī liye vo hamāre ḳhilāf ho gayā hai

ḳhudā ke kaan ka.ī be-zabān bharne lage

falak se toḌ ke laate rahe sitāroñ ko

unhīñ sitāroñ se phir āsmān bharne lage

mire harīfoñ kā itnā hī masla hai unheñ

mire ḳhilāf mire mehrbāñ bharne lage

hamārā vaqt bhī ab vo nahīñ rahā lekin

tumhārā dam bhī ka.ī naujavān bharne lage

ajiib haal zarā.at kā kar liyā ham ne

zamīn bech ke āḳhir lagān bharne lage

na.e sire se kahānī vo saañs lene lagī

ham is kahānī meñ lafzoñ se jaan bharne lage

hamārā ishq bhī sīdhā thā āriza dil kā

tumhāre husn se puurī dukān bharne lage

koī bhī fard barāmad huā na bastī se

ajiib ḳhauf se ḳhālī makān bharne lage

daraKHt raat parindon ke kan bharne lage

isi liye to wo unchi uDan bharne lage

isi liye wo hamare KHilaf ho gaya hai

KHuda ke kan kai be-zaban bharne lage

falak se toD ke late rahe sitaron ko

unhin sitaron se phir aasman bharne lage

mere harifon ka itna hi masla hai unhen

mere KHilaf mere mehrban bharne lage

hamara waqt bhi ab wo nahin raha lekin

tumhaara dam bhi kai naujawan bharne lage

ajib haal zaraat ka kar liya hum ne

zamin bech ke aaKHir lagan bharne lage

nae sire se kahani wo sans lene lagi

hum is kahani mein lafzon se jaan bharne lage

hamara ishq bhi sidha tha aariza dil ka

tumhaare husn se puri dukan bharne lage

koi bhi fard baramad hua na basti se

ajib KHauf se KHali makan bharne lage