daraKHton par parinde bolte hain

daraḳhtoñ par parinde bolte haiñ

nikal ghar se ki raste bolte haiñ

dar-o-dīvār se raunaq gharoñ kī

diloñ kā haal chehre bolte haiñ

yuuñ hī sīnoñ se kab niklī haiñ aaheñ

lage jab Thes shīshe bolte haiñ

koī be-sāḳhta jumla kabhī to

ye sab alfāz tote bolte haiñ

abhī to gul-fishānī ho rahī hai

ye dekheñ kyā vo aage bolte haiñ

garāñ us kī samā.at par na guzre

so ham kitnā sambhal ke bolte haiñ

tirā andāz sab ko bhā gayā hai

tire lahje meñ saare bolte haiñ

hai aisā shahr bhī ābād 'fārūq'

haiñ sab ḳhāmosh katbe bolte haiñ

daraKHton par parinde bolte hain

nikal ghar se ki raste bolte hain

dar-o-diwar se raunaq gharon ki

dilon ka haal chehre bolte hain

yun hi sinon se kab nikli hain aahen

lage jab Thes shishe bolte hain

koi be-saKHta jumla kabhi to

ye sab alfaz tote bolte hain

abhi to gul-fishani ho rahi hai

ye dekhen kya wo aage bolte hain

garan us ki samaat par na guzre

so hum kitna sambhal ke bolte hain

tera andaz sab ko bha gaya hai

tere lahje mein sare bolte hain

hai aisa shahr bhi aabaad 'faruq'

hain sab KHamosh katbe bolte hain