dard baDh kar dawa na ho jae

dard baḌh kar davā na ho jaa.e

zindagī be-maza na ho jaa.e

roktā huuñ mizha pe maiñ aañsū

gir ke dil kī sadā na ho jaa.e

nigah-e-iltifāt ke sadqe

dil kī dhaḌkan sivā na ho jaa.e

roz martā huuñ roz jiitā huuñ

terā va.ada vafā na ho jaa.e

aap se shikva ai ma.āz-allāh

lab tak aa kar duā na ho jaa.e

vo kisī kaam kā nahīñ jo dil

dard se āshnā na ho jaa.e

siinā aksar hai soz se ḳhālī

ziist be-mudda.ā na ho jaa.e

uf ye tahzīb-e-nau kī ḳhūñ-ḳhvārī

ḳhūn-e-insāñ ravā na ho jaa.e

dil-lagī dil-lagī meñ dekh 'habīb'

ishq kī ibtidā na ho jaa.e

dard baDh kar dawa na ho jae

zindagi be-maza na ho jae

rokta hun mizha pe main aansu

gir ke dil ki sada na ho jae

nigah-e-iltifat ke sadqe

dil ki dhaDkan siwa na ho jae

roz marta hun roz jita hun

tera wada wafa na ho jae

aap se shikwa ai maaz-allah

lab tak aa kar dua na ho jae

wo kisi kaam ka nahin jo dil

dard se aashna na ho jae

sina aksar hai soz se KHali

zist be-muddaa na ho jae

uf ye tahzib-e-nau ki KHun-KHwari

KHun-e-insan rawa na ho jae

dil-lagi dil-lagi mein dekh 'habib'

ishq ki ibtida na ho jae