dard-e-alam bhi kahin dard-e-mohabbat hi na ho

dard-e-ālam bhī kahīñ dard-e-mohabbat hī na ho

dil ke bahlāne kī ye bhī koī sūrat hī na ho

aaj taz.īn-e-jamāl ek fasāna hī sahī

kal ye mashshātgī-e-husn haqīqat hī na ho

un kī āñkhoñ meñ machaltā hai jo afsāna-e-shauq

sochtā huuñ kahīñ vo merī hikāyat hī na ho

be-ruḳhī par jise mahmūl kiyā kartā huuñ

vo bhī kuchh aap kā andāz-e-mohabbat hī na ho

aaj ḳhud husn ko dekhā hai sar-e-kūcha-e-ishq

dekheñ āġhāz koī taaza rivāyat hī na ho

aql bhī ab rasan-o-dār tak aa pahuñchī hai

tiflak-e-shauq kī ik ye bhī sharārat hī na ho

dard-e-alam bhi kahin dard-e-mohabbat hi na ho

dil ke bahlane ki ye bhi koi surat hi na ho

aaj tazin-e-jamal ek fasana hi sahi

kal ye mashshatgi-e-husn haqiqat hi na ho

un ki aankhon mein machalta hai jo afsana-e-shauq

sochta hun kahin wo meri hikayat hi na ho

be-ruKHi par jise mahmul kiya karta hun

wo bhi kuchh aap ka andaz-e-mohabbat hi na ho

aaj KHud husn ko dekha hai sar-e-kucha-e-ishq

dekhen aaghaz koi taza riwayat hi na ho

aql bhi ab rasan-o-dar tak aa pahunchi hai

tiflak-e-shauq ki ek ye bhi shararat hi na ho