dard-e-dil jaan ka aazar hai main jaanta hun

dard-e-dil jaan kā āzār hai maiñ jāntā huuñ

aur allāh madad-gār hai maiñ jāntā huuñ

maiñ binā kalima paḌhe bhī to musalmāñ Thahrā

haañ mire dosh pe zunnār hai maiñ jāntā huuñ

ek ik harf mahakne lagā phūloñ kī tarah

ye tirī garmī-e-guftār hai maiñ jāntā huuñ

rehn rakkhe jo mirī qaum ke mustaqbil ko

vo mirī qaum kā sardār hai maiñ jāntā huuñ

zulm ke shahr kī sachchā.iyāñ likhne vaalo

chehra chehra yahāñ aḳhbār hai maiñ jāntā huuñ

merī koshish se tire husn kī saarī tafsīr

chand lafzoñ meñ giraftār hai maiñ jāntā huuñ

jis ko paane meñ gañvā dī hai ka.ī saal kī niiñd

ab vahī bar-sar-e-paikār hai maiñ jāntā huuñ

terī duniyā meñ to aa.e haiñ payambar lākhoñ

kaun is fauj kā sardār hai maiñ jāntā huuñ

hañstī-gātī huī duniyā kī tabāhī kā sabab

havas-e-dirham-o-dīnār hai maiñ jāntā huuñ

TuuT jaatā hai har ik jaal yahāñ nafrat kā

ishq ke daam meñ sansār hai maiñ jāntā huuñ

bhāgnā chāhūñ bhī tujh se to kahāñ tak bhāgūñ

har taraf tū hī numūdār hai maiñ jāntā huuñ

dard-e-dil jaan ka aazar hai main jaanta hun

aur allah madad-gar hai main jaanta hun

main bina kalima paDhe bhi to musalman Thahra

han mere dosh pe zunnar hai main jaanta hun

ek ek harf mahakne laga phulon ki tarah

ye teri garmi-e-guftar hai main jaanta hun

rehn rakkhe jo meri qaum ke mustaqbil ko

wo meri qaum ka sardar hai main jaanta hun

zulm ke shahr ki sachchaiyan likhne walo

chehra chehra yahan aKHbar hai main jaanta hun

meri koshish se tere husn ki sari tafsir

chand lafzon mein giraftar hai main jaanta hun

jis ko pane mein ganwa di hai kai sal ki nind

ab wahi bar-sar-e-paikar hai main jaanta hun

teri duniya mein to aae hain payambar lakhon

kaun is fauj ka sardar hai main jaanta hun

hansti-gati hui duniya ki tabahi ka sabab

hawas-e-dirham-o-dinar hai main jaanta hun

TuT jata hai har ek jal yahan nafrat ka

ishq ke dam mein sansar hai main jaanta hun

bhagna chahun bhi tujh se to kahan tak bhagun

har taraf tu hi numudar hai main jaanta hun