dard-e-dil ki unhen KHabar na hui

dard-e-dil kī unheñ ḳhabar na huī

aah minnat-kash-e-asar na huī

apnī taqdīr raah par na huī

koī tadbīr kārgar na huī

jurm-e-ulfat se jhuk ga.iiñ āñkheñ

chaar un se mirī nazar na huī

naza.a meñ vo na aa.e bālīñ par

maut bhī merī mo'atabar na huī

dekhte haiñ sabhī nazar un kī

aur apnī nazar nazar na huī

yuuñ tamannā ke phuul murjhā.e

shāḳh-e-ummīd bārvar na huī

un se milne kī aarzū puurī

hashr se vo bhī peshtar na huī

hijr kī shab marīz-e-furqat ne

jaan de dī magar sahar na huī

aise jiine se maut behtar hai

zindagī zindagī agar na huī

saikḌoñ inqalāb aa.e magar

dil kī duniyā idhar-udhar na huī

laakh science ne taraqqī kī

dastaras maut par magar na huī

kyā kareñ sharh-e-hāl-e-dil 'sho.ala'

ġham kī rūdād muḳhtasar na huī

dard-e-dil ki unhen KHabar na hui

aah minnat-kash-e-asar na hui

apni taqdir rah par na hui

koi tadbir kargar na hui

jurm-e-ulfat se jhuk gain aankhen

chaar un se meri nazar na hui

naza mein wo na aae baalin par

maut bhi meri mo'atabar na hui

dekhte hain sabhi nazar un ki

aur apni nazar nazar na hui

yun tamanna ke phul murjhae

shaKH-e-ummid barwar na hui

un se milne ki aarzu puri

hashr se wo bhi peshtar na hui

hijr ki shab mariz-e-furqat ne

jaan de di magar sahar na hui

aise jine se maut behtar hai

zindagi zindagi agar na hui

saikDon inqalab aae magar

dil ki duniya idhar-udhar na hui

lakh science ne taraqqi ki

dastaras maut par magar na hui

kya karen sharh-e-haal-e-dil 'shoala'

gham ki rudad muKHtasar na hui