dard-e-dil ko jo main is dil ka hi hissa kar lun

dard-e-dil ko jo maiñ is dil kā hī hissa kar luuñ

dard kā dard miTe dil ko bhī achchhā kar luuñ

jab ki ḳhud hī meñ mujhe us kī jhalak miltī hai

hijr meñ sub.h talak ḳhud ko hī sajda kar luuñ

terī duniyā meñ bahut kaam haiñ hone yā-rab

maiñ akelā huuñ akelā hī maiñ kyā kyā kar luuñ

juujh saktā huuñ zamāne kī kisī mushkil se

shaktiyāñ apnī baḌhā kar jo maiñ ik-jā kar luuñ

apnī ġhazloñ ko nayā rang diyā hai maiñ ne

hijr meñ us ke maiñ is rang ko chokhā kar luuñ

paaTh ulfat kā paḌhānā hai mujhe duniyā ko

tū jo de saath to maiñ kaam ye puurā kar luuñ

ġham-e-jānāñ bhī mirā aur ġham-e-daurāñ bhī mirā

phir bhalā kyoñ maiñ kisī ġham kā mudāvā kar luuñ

kaun detā hai yahāñ saath kisī kā 'ālam'

kis ko hamrāz banā luuñ kise apnā kar luuñ

dard-e-dil ko jo main is dil ka hi hissa kar lun

dard ka dard miTe dil ko bhi achchha kar lun

jab ki KHud hi mein mujhe us ki jhalak milti hai

hijr mein subh talak KHud ko hi sajda kar lun

teri duniya mein bahut kaam hain hone ya-rab

main akela hun akela hi main kya kya kar lun

jujh sakta hun zamane ki kisi mushkil se

shaktiyan apni baDha kar jo main ik-ja kar lun

apni ghazlon ko naya rang diya hai main ne

hijr mein us ke main is rang ko chokha kar lun

paTh ulfat ka paDhana hai mujhe duniya ko

tu jo de sath to main kaam ye pura kar lun

gham-e-jaanan bhi mera aur gham-e-dauran bhi mera

phir bhala kyon main kisi gham ka mudawa kar lun

kaun deta hai yahan sath kisi ka 'alam'

kis ko hamraaz bana lun kise apna kar lun