dard-e-dil la-dawa nahin hota

dard-e-dil lā-davā nahīñ hotā

aap chāheñ to kyā nahīñ hotā

un kā va.ada vafā nahīñ hotā

jis ko samjho havā nahīñ hotā

ḳhud hī jab tak fanā nahīñ hotā

qatra dariyā-adā nahīñ hotā

hai ye nairangī-e-ḳhayāl faqat

kuchh bhī achchhā-burā nahīñ hotā

dar-ḳhūr-e-qahr ham to haiñ lekin

ishq kā ye sila nahīñ hotā

ho gayā dil judā ḳhudā.ī se

tujh se lekin judā nahīñ hotā

saarī duniyā ke tazkire haiñ vahāñ

zikr lekin mirā nahīñ hotā

dil se miTtā nahīñ ḳhayāl tirā

dil kā chāhā huā nahīñ hotā

vaa.e bar-hāl-e-nāḳhun-e-tadbīr

ek uqda bhī vā nahīñ hotā

jab vo hote nahīñ hamāre paas

kuchh bhī un ke sivā nahīñ hotā

be-ḳhudī-hā-e-mudda.ā kī qasam

mudda.ā mudda.ā nahīñ hotā

husn aur ishq ke sivā ai dil

kuchh bhī lā-intihā nahīñ hotā

dil ko thāme hue maiñ baiThā huuñ

dil meñ dard aaj kyā nahīñ hotā

be-kasī-hā-e-ġham hazār afsos

kyā ḳhudā bhī ḳhudā nahīñ hotā

haq yahī hai ki haqq-e-ishq tirā

laakh adā ho adā nahīñ hotā

ishq jab tak sharīk-e-hāl na ho

zindagī meñ maza nahīñ hotā

zulm dil par vo kitne hī Dhā.eñ

dil ko un se gila nahīñ hotā

vasl hotā visāl hotā hai

ālam-e-dil meñ kyā nahīñ hotā

dil pe jaisī balā.eñ chhātī haiñ

yuuñ hujūm-e-balā nahīñ hotā

aao ab qasd-e-dair kar dekheñ

yuuñ dar-e-ka.aba vā nahīñ hotā

rāhbar terā kaun hogā 'junūñ'

dil hī jab rahnumā nahīñ hotā

dard-e-dil la-dawa nahin hota

aap chahen to kya nahin hota

un ka wada wafa nahin hota

jis ko samjho hawa nahin hota

KHud hi jab tak fana nahin hota

qatra dariya-ada nahin hota

hai ye nairangi-e-KHayal faqat

kuchh bhi achchha-bura nahin hota

dar-KHur-e-qahr hum to hain lekin

ishq ka ye sila nahin hota

ho gaya dil juda KHudai se

tujh se lekin juda nahin hota

sari duniya ke tazkire hain wahan

zikr lekin mera nahin hota

dil se miTta nahin KHayal tera

dil ka chaha hua nahin hota

wae bar-haal-e-naKHun-e-tadbir

ek uqda bhi wa nahin hota

jab wo hote nahin hamare pas

kuchh bhi un ke siwa nahin hota

be-KHudi-ha-e-muddaa ki qasam

muddaa muddaa nahin hota

husn aur ishq ke siwa ai dil

kuchh bhi la-intiha nahin hota

dil ko thame hue main baiTha hun

dil mein dard aaj kya nahin hota

be-kasi-ha-e-gham hazar afsos

kya KHuda bhi KHuda nahin hota

haq yahi hai ki haqq-e-ishq tera

lakh ada ho ada nahin hota

ishq jab tak sharik-e-haal na ho

zindagi mein maza nahin hota

zulm dil par wo kitne hi Dhaen

dil ko un se gila nahin hota

wasl hota visal hota hai

aalam-e-dil mein kya nahin hota

dil pe jaisi balaen chhati hain

yun hujum-e-bala nahin hota

aao ab qasd-e-dair kar dekhen

yun dar-e-kaba wa nahin hota

rahbar tera kaun hoga 'junun'

dil hi jab rahnuma nahin hota