dard-e-dil soz-e-jigar yaad aaya

dard-e-dil soz-e-jigar yaad aaya

jab tirā tīr-e-nazar yaad aaya

ḳhāna-barbād vahāñ ab kyā hai

kaun sī baat pe ghar yaad aaya

jiite jī aap ne pūchhā mujh ko

lī kabhī ḳhair-ḳhabar yaad aaya

yaad aaya hameñ ik naqsh-e-qadam

hāsil-e-rāh-e-guzar yaad aaya

naḳhl-e-ulfat kī jo yaad aa.ī hameñ

jo milā thā vo samar yaad aaya

mujh se ho jā.egī ulfat ik din

baar baar us ko agar yaad aaya

maiñ qafas meñ bhī chunūñgā tinke

āshiyāñ mujh ko agar yaad aaya

jab gayā sar se ḳhudī kā saudā

ham ko allāh kā ghar yaad aaya

haath uThāte hī milā dil ko sukūñ

kyā duāoñ kā asar yaad aaya

be-ḳhud-e-shauq rahe ham jab tak

ḳhair yaad aa.ī na shar yaad aaya

apnī be-rāh-ravī par 'ḳhushtar'

sheva-e-ahl-e-hunar yaad aaya

dard-e-dil soz-e-jigar yaad aaya

jab tera tir-e-nazar yaad aaya

KHana-barbaad wahan ab kya hai

kaun si baat pe ghar yaad aaya

jite ji aap ne puchha mujh ko

li kabhi KHair-KHabar yaad aaya

yaad aaya hamein ek naqsh-e-qadam

hasil-e-rah-e-guzar yaad aaya

naKHl-e-ulfat ki jo yaad aai hamein

jo mila tha wo samar yaad aaya

mujh se ho jaegi ulfat ek din

bar bar us ko agar yaad aaya

main qafas mein bhi chununga tinke

aashiyan mujh ko agar yaad aaya

jab gaya sar se KHudi ka sauda

hum ko allah ka ghar yaad aaya

hath uThate hi mila dil ko sukun

kya duaon ka asar yaad aaya

be-KHud-e-shauq rahe hum jab tak

KHair yaad aai na shar yaad aaya

apni be-rah-rawi par 'KHushtar'

shewa-e-ahl-e-hunar yaad aaya