dard-e-dil us se bayan karta hai nadan koi

dard-e-dil us se bayāñ kartā hai nādāñ koī

sun ke jo kah de ki us kā nahīñ darmāñ koī

daulat-e-hosh-o-ḳhirad bhī vo luTā dete haiñ

tere dīvāne nahīñ rakhte haiñ sāmāñ koī

naza.a meñ pesh-e-nazar aa.ina a.amāl kā hai

pūchhte kyā ho ki hai kis liye hairāñ koī

bhuul kar bhī nahīñ aatā hai rihā.ī kā ḳhayāl

yā-rab itnā bhī na ho ḳhūgar-e-zindāñ koī

dafn haiñ hasrat-o-armāñ kī hazāroñ lāsheñ

dil se pahlū meñ ki hai gor-e-ġharībāñ koī

hasrateñ us dil-e-nākām kī allah allāh

jis kā niklā hī na ho dahr meñ armāñ koī

naza.a meñ kaash kisī ne bhī to pūchhā hotā

marne vaale tire dil meñ bhī hai armāñ koī

is tarah rakhtā huuñ dil meñ ruḳh-e-pur-nūr kī yaad

jaise siine se lagā.e hue qur.āñ koī

apne begāne kā jhagḌā hī miTā do 'vāsif'

aao ābād karo chal ke bayābāñ koī

dard-e-dil us se bayan karta hai nadan koi

sun ke jo kah de ki us ka nahin darman koi

daulat-e-hosh-o-KHirad bhi wo luTa dete hain

tere diwane nahin rakhte hain saman koi

naza mein pesh-e-nazar aaina aamal ka hai

puchhte kya ho ki hai kis liye hairan koi

bhul kar bhi nahin aata hai rihai ka KHayal

ya-rab itna bhi na ho KHugar-e-zindan koi

dafn hain hasrat-o-arman ki hazaron lashen

dil se pahlu mein ki hai gor-e-ghariban koi

hasraten us dil-e-nakaam ki allah allah

jis ka nikla hi na ho dahr mein arman koi

naza mein kash kisi ne bhi to puchha hota

marne wale tere dil mein bhi hai arman koi

is tarah rakhta hun dil mein ruKH-e-pur-nur ki yaad

jaise sine se lagae hue quran koi

apne begane ka jhagDa hi miTa do 'wasif'

aao aabaad karo chal ke bayaban koi