dard-e-furqat ka mudawa nahin hone dete

dard-e-furqat kā mudāvā nahīñ hone dete

ye masīhā mujhe achchhā nahīñ hone dete

ye zamāne ke taqāze ye rivāyāt-e-jahāñ

jaisā maiñ huuñ mujhe vaisā nahīñ hone dete

dil to aksar mujhe is moḌ pe laatā hai magar

mere aañsū mujhe rusvā nahīñ hone dete

maiñ kisī aur kā ho jā.ūñ ye kab mumkin hai

ḳhvāb mere mujhe apnā nahīñ hone dete

us kī furqat meñ guzāre hue lamhoñ ke nuqūsh

ek lamha mujhe tanhā nahīñ hone dete

ḳhaak hone nahīñ dete mujhe arbāb-e-nazar

kīmiyā-gar mujhe suunā nahīñ hone dete

ham meñ aksar se ḳhatā hotī hai sarzad ye 'shahāb'

ḳhud se ham ḳhud ko shanāsā nahīñ hone dete

dard-e-furqat ka mudawa nahin hone dete

ye masiha mujhe achchha nahin hone dete

ye zamane ke taqaze ye riwayat-e-jahan

jaisa main hun mujhe waisa nahin hone dete

dil to aksar mujhe is moD pe lata hai magar

mere aansu mujhe ruswa nahin hone dete

main kisi aur ka ho jaun ye kab mumkin hai

KHwab mere mujhe apna nahin hone dete

us ki furqat mein guzare hue lamhon ke nuqush

ek lamha mujhe tanha nahin hone dete

KHak hone nahin dete mujhe arbab-e-nazar

kimiya-gar mujhe suna nahin hone dete

hum mein aksar se KHata hoti hai sarzad ye 'shahab'

KHud se hum KHud ko shanasa nahin hone dete