dard-e-jigar KHud apni dawa ho aisa bhi ho sakta hai

dard-e-jigar ḳhud apnī davā ho aisā bhī ho saktā hai

yuuñ hī kitāb-e-zar meñ likhā ho aisā bhī ho saktā hai

hijr kī raat meñ sham-e-shabistāñ had se baḌh kar raushan thī

is hañgām meñ dil bhī jalā ho aisā bhī ho saktā hai

roz-e-azal jo ahd kiyā thā insāñ ne vo sach hī thā

bār-e-amānat uTh na sakā ho aisā bhī ho saktā hai

kahāñ nasheman dil kā banā.eñ uljhan bhī hai aur Dar bhī

ḳhud hī shikasta shāḳh-e-vafā ho aisā bhī ho saktā hai

harf-e-vafā kī koī vaq.at duniyā kī nazroñ meñ nahīñ

harf-e-vafā hī jhuuT kahā ho aisā bhī ho saktā hai

husn-o-ishq kī laag meñ āḳhir kis ko mujrim Thahrā.eñ

dil kā dāman chaak huā ho aisā bhī ho saktā hai

bahr-etamannā se 'rāhī' aa.ī hai sadā-e-ġharqābī

dil kā safīna Duub rahā ho aisā bhī ho saktā hai

dard-e-jigar KHud apni dawa ho aisa bhi ho sakta hai

yun hi kitab-e-zar mein likha ho aisa bhi ho sakta hai

hijr ki raat mein sham-e-shabistan had se baDh kar raushan thi

is hangam mein dil bhi jala ho aisa bhi ho sakta hai

roz-e-azal jo ahd kiya tha insan ne wo sach hi tha

bar-e-amanat uTh na saka ho aisa bhi ho sakta hai

kahan nasheman dil ka banaen uljhan bhi hai aur Dar bhi

KHud hi shikasta shaKH-e-wafa ho aisa bhi ho sakta hai

harf-e-wafa ki koi waqat duniya ki nazron mein nahin

harf-e-wafa hi jhuT kaha ho aisa bhi ho sakta hai

husn-o-ishq ki lag mein aaKHir kis ko mujrim Thahraen

dil ka daman chaak hua ho aisa bhi ho sakta hai

bahr-etamanna se 'rahi' aai hai sada-e-gharqabi

dil ka safina Dub raha ho aisa bhi ho sakta hai