dard hi zist ka unwan hua jata hai

dard hī ziist kā unvān huā jaatā hai

kaun paivast-e-rag-e-jān huā jaatā hai

dil uchhaltā hai ḳhushī se ki vahī shoḳh hasīñ

merī tanhā.ī kā mehmān huā jaatā hai

ik irāda hai ki āġhosh-dar-āġhosh huā

ek lamha hai ki rūmān huā jaatā hai

ek mastī hai ki āñkhoñ meñ bharī rahtī hai

ik tabassum ki ḳhumistān huā jaatā hai

sharm ke bojh se palkoñ kā kabhī jhuk jaanā

maut kā apnī ye sāmān huā jaatā hai

haa.e kyā mahshar-e-ḳhāmosh jagāyā tū ne

dil ke āshob pe ehsān huā jaatā hai

jitnā dukh thā mire siine meñ simaT aaya hai

ik nirālā sā ye mehmān huā jaatā hai

maiñ shahīd-e-rah-e-ulfat huuñ azal se 'sarmad'

yahī maslak mirā īmān huā jaatā hai

dard hi zist ka unwan hua jata hai

kaun paiwast-e-rag-e-jaan hua jata hai

dil uchhalta hai KHushi se ki wahi shoKH hasin

meri tanhai ka mehman hua jata hai

ek irada hai ki aaghosh-dar-aghosh hua

ek lamha hai ki ruman hua jata hai

ek masti hai ki aankhon mein bhari rahti hai

ek tabassum ki KHumistan hua jata hai

sharm ke bojh se palkon ka kabhi jhuk jaana

maut ka apni ye saman hua jata hai

hae kya mahshar-e-KHamosh jagaya tu ne

dil ke aashob pe ehsan hua jata hai

jitna dukh tha mere sine mein simaT aaya hai

ek nirala sa ye mehman hua jata hai

main shahid-e-rah-e-ulfat hun azal se 'sarmad'

yahi maslak mera iman hua jata hai