dard ek roz koi rang dikhae to bane

dard ik roz koī rañg dikhā.e to bane

ruuh gar chhoḌ ke tan dahr meñ aa.e to bane

nazar aa.eñ tire chehre ke ḳhad-o-ḳhāl tamām

dil se uTh jaa.eñ kabhī vahm ke saa.e to bane

vahdat-e-dard ho qariyoñ meñ havā kī mānind

ek ho jaa.eñ agar apne parā.e to bane

vā.izāñ muzhda ki jannat meñ bahār aa.ī hai

merī duniyā se ḳhizāñ lauT ke jaa.e to bane

dev-e-taqdīr khaḌā hai mere aage har dam

koī tadbīr ise zahr pilā.e to bane

jis ko dekhā kisī murde kā muqallid dekhā

apnī ho jaa.e har ik shaḳhs kī raa.e to bane

sab ke dukh suntā huuñ maiñ zo.af-e-za.īfī meñ vale

merā dukh koī mirī maañ ko sunā.e to bane

apne a.amāl ko auroñ se chhupā rakkhā hai

merī niyyat ko koī mujh se chhupā.e to bane

maiñ banātā to bahut huuñ nahīñ bantī lekin

vo ināyat se mirī baat banā.e to bane

dard ek roz koi rang dikhae to bane

ruh gar chhoD ke tan dahr mein aae to bane

nazar aaen tere chehre ke KHad-o-KHal tamam

dil se uTh jaen kabhi wahm ke sae to bane

wahdat-e-dard ho qariyon mein hawa ki manind

ek ho jaen agar apne parae to bane

waizan muzhda ki jannat mein bahaar aai hai

meri duniya se KHizan lauT ke jae to bane

dew-e-taqdir khaDa hai mere aage har dam

koi tadbir ise zahr pilae to bane

jis ko dekha kisi murde ka muqallid dekha

apni ho jae har ek shaKHs ki rae to bane

sab ke dukh sunta hun main zoaf-e-zaifi mein wale

mera dukh koi meri man ko sunae to bane

apne aamal ko auron se chhupa rakkha hai

meri niyyat ko koi mujh se chhupae to bane

main banata to bahut hun nahin banti lekin

wo inayat se meri baat banae to bane