dard ka shahr hai arman ki baaten kar len

dard kā shahr hai armān kī bāteñ kar leñ

saare rauñde hue insān kī bāteñ kar leñ

ġham-o-ālām kī likkhī hai kahānī ham ne

bazm-e-ahbāb meñ unvān kī bāteñ kar leñ

ḳhud-ġharaz logoñ meñ hātim ko kahāñ DhūñDeñ ham

kū-e-iflās meñ imkān kī bāteñ kar leñ

naf-o-nuqsāñ se sarokār nahīñ hai ham ko

ḳhādim-e-ḳhalq haiñ ehsān kī bāteñ kar leñ

munsif-e-vaqt agar kho gayā tārīkī meñ

tāroñ kī chhāñv meñ mīzān kī bāteñ kar leñ

aaj mahfil meñ chale aa.e haiñ 'jāmī' kaise

un se ham vaqt ke bohrān kī bāteñ kar leñ

dard ka shahr hai arman ki baaten kar len

sare raunde hue insan ki baaten kar len

gham-o-alam ki likkhi hai kahani hum ne

bazm-e-ahbab mein unwan ki baaten kar len

KHud-gharaz logon mein hatim ko kahan DhunDen hum

ku-e-iflas mein imkan ki baaten kar len

naf-o-nuqsan se sarokar nahin hai hum ko

KHadim-e-KHalq hain ehsan ki baaten kar len

munsif-e-waqt agar kho gaya tariki mein

taron ki chhanw mein mizan ki baaten kar len

aaj mahfil mein chale aae hain 'jami' kaise

un se hum waqt ke bohran ki baaten kar len