dard ki KHushbu se sara ghar moattar ho gaya

dard kī ḳhushbū se saarā ghar mo.attar ho gayā

zaḳhm khā khā kar badan phūloñ kā paikar ho gayā

mā.il-e-parvāz har lahza hai murġh-e-justujū

maiñ jo sīḌhī par chaḌhā vo aur uupar ho gayā

gauhar-e-ummīd laa.eñ kis athāh meñ Duub kar

ham jo ġhota-zan hue gahrā samundar ho gayā

tirchhe sūraj kī shuā.eñ de ga.iiñ ik ham-safar

merā saaya hī mire qad ke barābar ho gayā

ham shafaq ko dekh kar tārīkiyoñ meñ kho ga.e

aag chhat par thī dhuāñ kamre ke andar ho gayā

peḌ par baiThe parindoñ par gumāñ pattoñ kā thā

dam-zadan meñ aañkh se ojhal vo manzar ho gayā

sub.h kā āġhāz thā aur chehre par thī gard-e-shab

phuul kī sūrat shagufta maiñ nahā kar ho gayā

maiñ samajhtā thā ta.āqub meñ faqat haiñ vāhme

lauT kar dekhā magar jis ne bhī patthar ho gayā

sañg paanī meñ girā kar dekh lo ubhregī lahr

baat aisī thī ki maiñ aape se bāhar ho gayā

jin daraḳhtoñ kī ghanī chhāñv thī vo sab kaT ga.e

yuuñ lagā 'shāhid' mujhe jaise maiñ be-ghar ho gayā

dard ki KHushbu se sara ghar moattar ho gaya

zaKHm kha kha kar badan phulon ka paikar ho gaya

mail-e-parwaz har lahza hai murgh-e-justuju

main jo siDhi par chaDha wo aur upar ho gaya

gauhar-e-ummid laen kis athah mein Dub kar

hum jo ghota-zan hue gahra samundar ho gaya

tirchhe suraj ki shuaen de gain ek ham-safar

mera saya hi mere qad ke barabar ho gaya

hum shafaq ko dekh kar tarikiyon mein kho gae

aag chhat par thi dhuan kamre ke andar ho gaya

peD par baiThe parindon par guman patton ka tha

dam-zadan mein aankh se ojhal wo manzar ho gaya

subh ka aaghaz tha aur chehre par thi gard-e-shab

phul ki surat shagufta main naha kar ho gaya

main samajhta tha taaqub mein faqat hain wahme

lauT kar dekha magar jis ne bhi patthar ho gaya

sang pani mein gira kar dekh lo ubhregi lahr

baat aisi thi ki main aape se bahar ho gaya

jin daraKHton ki ghani chhanw thi wo sab kaT gae

yun laga 'shahid' mujhe jaise main be-ghar ho gaya