dard ki naw ko aankhon ke samundar se nikal

dard kī naav ko āñkhoñ ke samundar se nikāl

tab kisī zaḳhm kī zanjīr ko langar se nikāl

apnī āñkhoñ ko sar-e-shahr-e-tamāshā na banā

apnī shikneñ kabhī peshānī-e-chādar se nikāl

ġham ke saa.e meñ na baiThegā kabhī ḳhāna-ba-dosh

dhuup hī is kā muqaddar hai ise ghar se nikāl

tū hī qādir hai tū is vahshat-e-dil kī ḳhātir

ab ye sahrā-e-sitam mere muqaddar se nikāl

shor chubhtā hai hamesha se mire kānoñ ko

ab ye sannāTā mirī ruuh ke andar se nikāl

merī āñkheñ bhī kabhī niiñd kī lazzat chakh leñ

merī āñkheñ bhī kabhī ḳhvāb ke manzar se nikāl

māntā hī nahīñ ve baat kabhī bhī merī

bārhā maiñ ne kahā paañv na chādar se nikāl

baad meñ baiTh ke shiknoñ ko miTā ai 'shārib'

pahle āvāra tamannāoñ ko bistar se nikāl

dard ki naw ko aankhon ke samundar se nikal

tab kisi zaKHm ki zanjir ko langar se nikal

apni aankhon ko sar-e-shahr-e-tamasha na bana

apni shiknen kabhi peshani-e-chadar se nikal

gham ke sae mein na baiThega kabhi KHana-ba-dosh

dhup hi is ka muqaddar hai ise ghar se nikal

tu hi qadir hai tu is wahshat-e-dil ki KHatir

ab ye sahra-e-sitam mere muqaddar se nikal

shor chubhta hai hamesha se mere kanon ko

ab ye sannaTa meri ruh ke andar se nikal

meri aankhen bhi kabhi nind ki lazzat chakh len

meri aankhen bhi kabhi KHwab ke manzar se nikal

manta hi nahin we baat kabhi bhi meri

barha main ne kaha panw na chadar se nikal

baad mein baiTh ke shiknon ko miTa ai 'shaarib'

pahle aawara tamannaon ko bistar se nikal